FANDOM


ته چې ماته وائې چې په څه کوې ژړا

نه درمعلومېږي دغه خپل جور ؤ جفا

ته جور ؤ جفا کړې زه ژړا کوم دلبره

ستا که دغه نه وي دا به هم نه وي زما

څه ښادي به کاندي طائفه د عاشقانو

رسم د بُتانو که هم دا وي لکه ستا

دا خصلت چې ستا دی که هم تل په دغه شان وي

نه رامعلومېږي د دردمند د زړه دوا

يو داستا ماڼۍ شو بل غرور د رقيبانو

وار په وار مې وژني کله هغه کله دا

هر چې عاشقي کا که په قطع افلاطون وي

زه خو ئې مجنون ګڼم که نن وي که سبا

سپئ هم په عذاب د جدائۍ د وژلو نه دی

زه خو ګوندې ستا د کوڅې سپئ شوم په وينا

هېڅ ئې پکار نه دی رحمانه تا غواړي دلبره

دا زما رضا ده باقي هر چې ستا رضا