FANDOM


تل به په لار د مېړنو سره ځم

يمه پښتون د پښـتنو سره ځم

ای د مليت لمره د پرخې په څېر

ستا د دې شوخو پلوشو سره ځم

دا چې خرد هم په ملت ځاروي

زه د همـداسې لېونو سره ځم

پام كوه زه هغـه نظر نه يمه

چې به په دود د سپېلنو سره ځم

وايي اغيار چـې د دوزخ ژبه ده

زه به جنت ته د پښـتو سره ځم

راستنېدى چې نه شي وخت خو نه يم

خـو د حـالت د تقاضـو سره ځم

كړمه جـهان چې د پښتون ځملی

د خپلو پېغلو حوصلو سره ځم

وړم مستقبل ته د ماضي روايات

زه د خپل حـال د ولولو سره ځم

څــو چې راغونډ په يو مركز يې نه كړم

هرې تپې ته د جرګو سـره ځم